"Sämichatzes Schatz für die einte – für die angere Sämischatzes Chatz"

Vor langer, langer Zyt, wo no keni Renntier am Wiehnachtsmaa sy Schlitte voll belade mit bunttschäggete Päckli dür d'Lüft gondelet hei u dr Samichlous nid grösser als dr Stifel vo sym Ätti isch gsi, het am Ändi vo dr länge Strass, wo bis zum Nordpol füehrt, äs schrumplig chlyses Hutzufroueli äs munzigs Chätzli vor dr Huustür gfunge. Verstrublet u verchutzet het sech das Gschöpfli zu'mene Chlungeli zämegrollt gha u we's nid so zfride vor sech häregschnüürelet hät, de hät me ällwä no gmeint, äs sygi ä Schneeballe, oder's spätischtens im Frühelig als Stoubchlüngel wäggwüscht. Sys Motöörele isch aber häller als ds fynschte Himelsglöggeli gsi, u ds Hutzufroueli isch drum mit grosse Ouge, wie se d'Ching vor'em gschmückte Wiehnachtsboum mache, blibe stah. Nach ämene Wyli isch's achegrüpelet u het nid so rächt gwüsst, gob's äch das Wäse dörf alänge und ufhäbe.

Myni Mueter wüsst jitz bestimmt Rat, het's by sech däijcht, u wie'ne Blitz isch ihm i Sinn cho, dass me wungerbari Sache nid darf alänge, das tüeng nämlech niemerem guet u schadi nume.

Aber so i aller Schafschelti het ds Anneli das läbige Balleli de o nid wölle lah sy. Also het's äs paar Holzbrättli, ä Sagi, ä Hammer u Nägel gholt und um das Chatzechlungeli ume ä Schutzwang bout, nid z'äng u mit ämene gnue grosse Tööri, drmit's bym Verwache nid öpe no Platzangscht überchunt oder meint, äs sygi gfange und ygsperrt. De het ds Anneli sys Chopfchüssi gnoh u Trömli um Trömli byr Naht uftrennt, äs paar Hampfele Gänsefädere drusgnoh, ds Chüssi wieder zämegschnurpfet und ir Mitti ä Duele drygnäijht. Stolz het's sys Wärch agluegt, wo fasch wie'ne Schüssle het usgeh, aber äbe nid us Ton, sondern us Stoff u Fädere.

I däm Huli inne isch ds Chätzli no chly meh gäge chalt Bisluft gschützt, het's lysli vor sech häregmüürmeret. Aber wie cha'ni äch das i dä chlyn Brätterverschlag lege, ohni das Wunger z'störe? [...]

ISBN 978-3-9522938-2-2